ବଡ଼ବିଲ/୧୧/୦୬ – ଗତ ମଙ୍ଗଳବାର, ବଡ଼ବିଲ ଥାନା ଭଦ୍ରାସାହି ପଞ୍ଚାୟତର ଫୁଲୱାଡ଼ି ମୁଣ୍ଡାସାହି ଖେଳ ପଡ଼ିଆ ନିକଟସ୍ଥ ଜଙ୍ଗଲର ଏକ ଖାଲରୁ, ଯୁବକର କ୍ଷତାକ୍ତ ମୃତଦେହ ମିଳିବା ଘଟଣାରେ ପୋଲିସକୁ ମିଳିଛି ବଡ଼ ସଫଳତା । ହତ୍ୟା କାଣ୍ଡରେ ସଂପୃକ୍ତ ଯୋଡ଼ା ଥାନା କଳାପାହାଡ଼ ଅଞ୍ଚଳର ଜଣେ ୧୩ ବର୍ଷିୟ ନାବାଳକକୁ ହେପାଜତକୁ ନେବା ସହ ସଞ୍ଜୟ ମୁଣ୍ଡା ନାମକ ଅନ୍ୟ ଜଣେ ଅଭିଯୁକ୍ତଙ୍କୁ ଗିରଫ୍ କରିଛି ବଡ଼ବିଲ ପୋଲିସ୍।
ଚୋରି ଓ ଲୁଟ୍ ଟଙ୍କା ଭାଗ ବଣ୍ଟାକୁ ନେଇ ଏହି ହତ୍ୟାକାଣ୍ଡ ଘଟିଥିଲା ବୋଲି ଆଜି ଏକ ପ୍ରେସ୍ ମିଟରେ ସୂଚନା ଦେବା ସହ ପୂରା ଘଟଣାର ଖୁଲାସା କରିଛନ୍ତି ବଡ଼ବିଲ ଏସଡିପିଓ ଦେବେନ୍ଦ୍ରନାଥ ପିଙ୍ଗୁଆ ।
ପୁରା ଘଟଣା କ୍ରମ ଥିଲା ଏହିପରି –
ଦୁଇ ଅଭିଯୁକ୍ତ ଏବଂ ମୃତକ ଏହି ତିନିଜଣ ଛୋଟ ମୋଟ ଧରଣର ବିଭିନ୍ନ ଲୁଟ୍ ଏବଂ ଚୋରି ଘଟଣା ଭିଆଇ ଥାଆନ୍ତି। ନାବାଳକ ଅଭିଯୁକ୍ତ ଜଣକ ମୃତକର ଏକ ମୋବାଇଲ୍ ଫୋନ୍ ନେଇ ଫେରାଉ ନଥିଲେ ଫଳରେ ଉଭୟଙ୍କ ମଧ୍ୟରେ ତିକ୍ତତା ଦେଖାଦେଇଥିଲା । ତେବେ ପରେ ଘଟଣା ଦିନ ନାବାଳକ ଜଣକ ଫୋନ୍ କୁ ଫେରାଇ ଦେଇଥିଲେ ।
ଘଟଣା ଦିନ ଅର୍ଥାତ୍ ଗତ ସୋମବାର୍ ସନ୍ଧ୍ୟାରେ ତିନି ଜଣ ଯାକ ଚାଲି ଚାଲି ଯାଇ ଫୁଲୱାଡ଼ି ମୁଣ୍ଡାସାହି ଖେଳ ପଡ଼ିଆରେ ପହଞ୍ଚି ଥିଲେ । ସେଠାରେ ମଦ ଗଞ୍ଜେଇ ନିଶା ସେବନ ପରେ ସେମାନଙ୍କ ମଧ୍ୟରେ ଟଙ୍କା ଭାଗ ବଣ୍ଟାକୁ ନେଇ ବଚସା ହୋଇଥିଲା । କିଛି ସମୟ ପରେ ଅତ୍ୟଧିକ ନିଶାଗ୍ରସ୍ତ ହୋଇ ମୃତକ ଶୋଇପଡ଼ିବା ପରେ ଅଭିଯୁକ୍ତ ନାବାଳକ ଏବଂ ଅଭିଯୁକ୍ତ ସଞ୍ଜୟ ମୁଣ୍ଡା ଏକ ପଥର ନେଇ ମୃତକର ମୁଣ୍ଡକୁ ବାରମ୍ବାର ଆଘାତ କରିଥିଲେ, ଫଳରେ ତାଙ୍କର ସେଇଠାରେ ହିଁ ମୃତ୍ୟୁ ହୋଇଥିଲା । ହତ୍ୟାକାଣ୍ଡ ଭିଆଇବା ପରେ ମୃତକର ମୋବାଇଲ୍ ଫୋନକୁ ନାବାଳକ ନେଇଯିବା ସହିତ ଉଭୟ ମିଶି ମୃତଦେହକୁ ପ୍ରାୟ ୩୦ ମିଟର୍ ପର୍ଯ୍ୟନ୍ତ ଘୋଷାରି ନେଇ ଜଙ୍ଗଲରେ ଥିବା ଏକ ଖାଲରେ ଫିଙ୍ଗି ଦେଇ ପଳାଇଥିଲେ ।
ଏହି ଘଟଣାର ପରଦିନ ଅର୍ଥାତ୍ ମଙ୍ଗଳବାର, ସ୍ଥାନୀୟ ଲୋକଙ୍କ ଠାରୁ ସୂଚନା ପାଇ, ବଡ଼ବିଲ୍ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ପ୍ରମାଣ ସଂଗ୍ରହ ପାଇଁ ଅପରାଧ୍ ସ୍ଥଳକୁ କର୍ଡନ୍ କରି ରଖିବା ସହିତ ଅପରାଧୀଙ୍କୁ ଧରିବା ପାଇଁ ସ୍ନିଫର୍ ଡଗ୍ ଏବଂ ଫରେନ୍ସିକ୍ ଟିମ୍ ର ସାହାଯ୍ୟ ନେଇଥିଲା ପୋଲିସ ।
ପରଦିନ ଅର୍ଥାତ୍ ବୁଧବାର, ପୋଲିସକୁ ମୃତ ଯୁବକର ପରିଚୟ ମିଳିଥିଲା । ଜଣାପଡ଼ିଥିଲା ଯେ, ମୃତକ ହେଉଛି ଯୋଡ଼ା ହୁଡ଼ି ସାହିର ବାଦଲ ସିଂ ଓରଫ୍ ହାତୀ । ମୃତକର ବାପା ମାଆ ମୃତଦେହ ଚିହ୍ନଟ କରିବା ପରେ ପରିଚୟ ସ୍ପଷ୍ଟ ହୋଇଥିଲା । ଛାନଭିନ୍ ପରେ ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ ନାବାଳକ ନିକଟରୁ ମୋବାଇଲ ଫୋନ୍ ଜବତ୍ କରିଛି । ଏଥି ସହ ହତ୍ୟାରେ ବ୍ୟବହୃତ ପଥର ମଧ୍ୟ ଜବତ୍ ହୋଇଥିବା ଜଣାପଡ଼ିଛି । ଉଭୟ ଅଭିଯୁକ୍ତ ପୋଲିସ୍ ଆଗରେ ଘଟଣା ଭିଆଇଥିବା ନେଇ ସ୍ୱୀକାର କରିଛନ୍ତି ବୋଲି ସୂଚନା ଦିଆଯାଇଛି ।
ଅଭିଯୁକ୍ତ ସଞ୍ଜୟ ମୁଣ୍ଡାକୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ବେଳେ, ନାବାଳକ ଅଭିଯୁକ୍ତକୁ କେନ୍ଦୁଝର ସ୍ଥିତ ପ୍ରିନ୍ସପାଲ୍ ମାଜିଷ୍ଟ୍ରେଟ ଜୁଭେନାଇଲ ଜଷ୍ଟିସ ବୋର୍ଡଙ୍କ କୋର୍ଟରେ ହାଜର କରାଯିବ ବୋଲି ପୋଲିସ୍ କହିଛି ।
