ପାକିସ୍ତାନ ବାଲୁଚିସ୍ତାନରେ PNS ସିଦ୍ଦିକି ନାଭାଲ ଏୟାର ଷ୍ଟେସନ ଉପରେ ବଡ଼ ଧରଣର ଆକ୍ରମଣ; ନିଜକୁ ଦାୟୀ କଲା ବାଲୁଚିସ୍ତାନ-ଲିବରେସନ୍-ଆର୍ମି ।
ନୂଆଦିଲ୍ଲୀ/୨୬/୦୩ – ପାକିସ୍ତାନ ବାଲୁଚିସ୍ତାନର ତୁର୍ବତ୍ ରେ ଅବସ୍ଥିତ PNS ସିଦ୍ଦିକି ନାଭାଲ ଏୟାର ଷ୍ଟେସନ ଉପରେ ଏକ ବଡ଼ ଆକ୍ରମଣ ହୋଇଛି। ପାକିସ୍ତାନର ଏହି ଦ୍ୱିତୀୟ ବୃହତ୍ତମ ଏୟାର ଷ୍ଟେସନରେ ମଙ୍ଗଳବାର ସକାଳେ ଗୁଳି ମାଡ଼ ସହ ବୋମା ମାଡ଼ କରାଯାଇଛି । ଏହି ଆକ୍ରମଣ ପାଇଁ ବାଲୁଚିସ୍ତାନ-ଲିବରେସନ୍-ଆର୍ମି (BLA) ର ମାଜିଦ୍ ବ୍ରିଗେଡ୍ ନିଜକୁ ଦାୟୀ କରିଛି। ବିଏଲଏ କହିଛି ଯେ, ତାଙ୍କର ଯୋଦ୍ଧାମାନେ ବିମାନ ଷ୍ଟେସନରେ ପ୍ରବେଶ କରି ଗୁଳି ବର୍ଷଣ କରିଛନ୍ତି । ଚାଇନାର ପୁଞ୍ଜି ବିନିଯୋଗକୁ ବିରୋଧ କରି ବାଲୁଚିସ୍ତାନ ଲିବରେସନ୍ ଆର୍ମି ଆକ୍ରମଣ କରିଥିବା କୁହାଯାଉଛି ।
ଏୟାର ଷ୍ଟେସନରେ ଆକ୍ରମଣ ପରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି ଏବଂ ନିରନ୍ତର ପାଟ୍ରୋଲିଂ କରାଯାଉଛି। ଆକ୍ରମଣ ପରେ (ତୁର୍ବତ) ରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି। ହସ୍ପିଟାଲର ସମସ୍ତ ଡାକ୍ତରଙ୍କୁ ତୁରନ୍ତ ଡ୍ୟୁଟିରେ ରିପୋର୍ଟ କରିବାକୁ କୁହାଯାଇଛି। ଏହି ସପ୍ତାହରେ BLA ର ଏହା ଦ୍ଵିତୀୟ ଏବଂ ଚଳିତ ବର୍ଷ ତୃତୀୟ ଆକ୍ରମଣ । ଏହାପୂର୍ବରୁ, BLA ଗତ ଜାନୁଆରୀ ୨୯ରେ ମ୍ୟାଚ୍ ସହର ଏବଂ ୨୦ ମାର୍ଚ୍ଚରେ ଗ୍ବାଦରରେ ସାମରିକ ଗୁପ୍ତଚର ମୁଖ୍ୟାଳୟକୁ ଟାର୍ଗେଟ କରିଥିଲା।
ଏବେ ସୁଦ୍ଧା ପାକିସ୍ତାନୀ ସେନା କିମ୍ବା ସରକାରଙ୍କ ପକ୍ଷରୁ ଏ ବାବଦରେ କୌଣସି ବିବୃତ୍ତି ଦିଆଯାଇ ନାହିଁ। ଦୁଇ ପାକିସ୍ତାନୀ ସୈନିକ ଏବଂ ଆଠ ଜଣ ଆତଙ୍କବାଦୀ ମଧ୍ୟ ପ୍ରାଣ ହରାଇଥିବା କୁହାଯାଉଛି । ପାକିସ୍ତାନର ଆନ୍ତରିକ ସେବା ଜନସମ୍ପର୍କ ବିଭାଗ କହିଛି ଯେ, ଆତଙ୍କବାଦୀଙ୍କ ପ୍ରବେଶ ଉଦ୍ୟମକୁ ବନ୍ଦର ସୁରକ୍ଷା ବାହିନୀ ସଫଳତାର ସହ ବିଫଳ କରିଛି ।
